Nemesio Rey considera “satisfactorio” o balance da feira e asegura que “ten moito percorrido”

25 Setembro, 2018 |by wecom | 0 Comments | blog | ,

O xerente da Fundación de Exposicións e Congresos da Estrada, Nemesio Rey, cualificou hoxe como “satisfactorio” o balance da 32ª Feira do Moble de Galicia desde a perspectiva da organización e asegura que as cifras de visitantes e as valoracións xerais dalgúns expositores constatan que o certame “aínda ten moito percorrido por diante, para que siga a ser o referente do moble da Estrada en toda Galicia”.

Na rolda de prensa ofrecida este mediodía no recinto feiral, Nemesio Rey considerou que os cambios introducidos este ano -a eliminación dos stands fixos, a redistribución dos espazos, a redución de nove a cinco días e a maior aposta no eido da comunicación e o marketing- foron “positivos”. “Non quero ser triunfalista, pero sabemos que facendo así as cousas e seguindo con esta dinámica, a Feira do Moble pode superar as cifras deste ano, que xa foron realmente boas”, apuntou.

Para iso, apelou ao “traballo conxunto das administracións, a fundación e o sector” para seguir impulsando a feira. Desde a perspectiva da fundación, asumiu o reto de “tentar traer aínda máis mobles que este ano, incluso aumentando algún pavillón o ano que vén”, para responder á demanda manifestada nas enquisas polos visitantes, que desexan contar con máis stands de mobiliario e cunha maior diversidade de oferta e de estilos.

De cara ao futuro, o xerente da fundación anunciou que “en breve” convocará unha reunión co sector do moble, priorizando aos expositores que participaron nesta edición da feira, pero convidando tamén a aqueles que non o fixeron para “escoitar as súas opinións” e tentar convencelos de que asistan o vindeiro ano. “Nós facemos  a nosa valoración, pero tamén queremos escoitar o que os expositores viron desde os seus stands, desde dentro da feira, para, entre todos, seguir cambiando e mellorando cousas”, remarcou.

En canto aos posibles cambios, Nemesio Rey apuntou que unha das cuestións que se valorará será a ampliación do horario de peche, pasando das oito da tarde ás nove, así a potenciación dos showcookings e a incorporación “doutras actividades paralelas que chamen realmente a atención”.

 

KEEP READING

O 56% dos visitantes realizou compras na feira ou estableceu contactos para mercar

24 Setembro, 2018 |by wecom | 0 Comments | blog | , ,

As enquisas realizadas polo persoal da organización da 32ª Feira do Moble de Galicia a preto de 600 das case 12.000 persoas que visitaron o recinto feiral desde o mércores ata onte revelan que un 56% dos enquisados realizou compras directas durante a feira ou estableceu contactos con expositores coa intención de formalizar algunha compra no futuro.

Ademais, o impacto económico da feira non só se limitou ao interior do recinto feiral, senón que o 9% dos enquisados procedentes de fóra da Estrada pernoctaron alomenos unha noite no municipio e o 40% do total dos enquisados realizaron gasto en restaurantes da zona. Precisamente, en canto á lugar de orixe, o 56% dos enquisados chegou de diferentes puntos da provincia de Pontevedra -a metade deles do municipio estradense-, seguidos da provincia da Coruña (33%), de Ourense (5%), de Lugo (4%) e doutros lugares (2%).

Respecto do impacto económico da feira, as estatísticas revelan tamén que o 33% dos enquisados asegurou ter realizado compras no comercio local, o 55% acudiu a bares, cafetarías ou estacións de servizo e o 22% apuntou que, aproveitando a visita á feira, tamén realizou algunha visita turística na Estrada.

En canto á valoración desta trixésimo segunda edición da feira, o 78% dos enquisados aproba en xeral o certame, sendo o 14% os que o puntúan cun suficiente, o 20% cun ben, o 35% cun notable e o 9% cun sobresaínte. Pola contra, só un 22% a valoran con notas inferiores ao 5.

Ademais, o 73% dos enquisados amósase satisfeito (64%) ou moi satisfeito (9%) coa calidade dos expositores participantes nesta feira, se ben un 44% do total considera que a cantidade de firmas é insatisfactoria. Precisamente, o incremento da cantidade dos expositores, así como a necesidade de priorizar a presenza de fabricantes e comerciantes de mobles en detrimento doutros sectores complementarios, xunto coa conveniencia de reforzar a presenza de novos estilos -máis modernos e innovadores-, son as principais suxestións aportadas nas enquisas.

Interese maioritario no mobiliario

Estes datos confirman as respostas ofrecidas sobre os sectores que máis interesan aos visitantes, sendo o mobiliario o primeiro (63%), seguido a distancia dos complementos (18%), as antigüidades (11%) e outros (8%).

Outro dato de interese é que o 34% do total das persoas enquisadas visitaban a Feira do Moble por primeira vez e un 53% adiantou a súa intención de volver visitala o vindeiro ano, deixando aberta esta posibilidade o 33%.

KEEP READING

A 32ª Feira do Moble pecha as portas con preto de 12.000 visitantes en só cinco días

23 Setembro, 2018 |by wecom | 0 Comments | blog | ,

O recinto feiral da Estrada acaba de pechar as portas da 32ª Feira do Moble de Galicia tras recibir a visita de preto de 12.000 persoas desde o pasado mércores, alcanzando en só cinco días as cifras de afluencia de público rexistradas durante as nove xornadas da feira do ano pasado.

 

O xerente da Fundación de Exposicións e Congresos, Nemesio Rey, indicou que esta xornada dominical foi “con gran diferencia” a que concentrou un maior número de visitantes -especialmente entre as catro e as oito da tarde- e destacou que “había tempo que non se lembraban colas de espera para comprar as entradas”.

 

Segundo avanzou, o martes comparecerá nunha rolda de prensa para expoñer, desde a perspectiva da organización, un balance exhaustivo desta edición, á que se referiu “como a mellor dos últimos tempos”, e para facer tamén unha valoración dos resultados das enquisas realizadas aos visitantes, que xa se darán a coñecer ao longo da xornada de mañá.

KEEP READING

Gonzalo Caballero reclama que a Xunta “cumpra os deberes” coa Cidade do Moble, a autovía e a ampliación do solo industrial

23 Setembro, 2018 |by wecom | 0 Comments | blog | ,

A derradeira xornada da 32ª Feira do Moble de Galicia estivo marcada pola mañá pola visita do secretario xeral do PSdeG, Gonzalo Caballero, que aproveitou o seu percorrido polos stands para “poñer en valor a Feira do Moble da Estrada, que é unha referencia do sector a nivel nacional e internacional e un elemento significativo para o desenvolvemento da Estrada e da contorna e que representa tamén a capacidade do sector produtivo galego de dar emprego, de facer investimentos e de adaptarse aos novos tempos internacionais”.

Gonzalo Caballero cuestionou tamén que “Feijoo siga na súa escalada de especulación sobre o seu futuro mentres A Estrada segue a ter problemas moi importantes para ser arranxados”. Así, apuntou que “a Feira do Moble é unha mostra evidente de que hai un potencial produtivo en Galicia que necesita de impulso desde a Consellería de Economía, Emprego e Industria e desde o Goberno da Xunta de Galicia, que non está a cumprir os seus deberes cos sectores produtivos do país”.

“Os incumprimentos da Cidade do Moble, os problemas de infraestruturas, en concreto a autovía de conexión con Santiago, os problemas de solo industrial cun polígono que está esgotado e que non permite que haxa maior capacidade de industria nesta bisbarra e os recurtes sociais da dereita poñen enriba da mesa un problema real, que é que A Estrada, un concello de referencia na estrutura xeográfica de Galicia, está nunha situación dunha encrucillada histórica; porque concellos como A Estrada, en función do que se faga coas políticas públicas poderán ter a posibilidade de ser concellos importantes con calidade de vida para os seus cidadáns ou acabarán estando nunha liña de esgotamento que os converterá en concellos cada vez máis envellecidos e sen posibilidade de futuro para xente máis nova e sen capacidade de xerar emprego. Para iso é necesario rexenerar o plan de traballo sobre o sector do moble na Estrada, que incorpore unha actividade de I+D+i, que é fundamental para poder dinamizar o sector produtivo e facelo máis competitivo”, remarcou.

KEEP READING

A innovación nos acabados e revestimentos, protagonista no cuarto día da Feira do Moble

22 Setembro, 2018 |by wecom | 0 Comments | blog | , ,

O innovador proxecto Erasmus+ FUTUREfacing, centrado na innovación nos acabados e revestimentos que se empregan na fabricación de mobles, foi un dos protagonistas centrais desta cuarta xornada da 32ª Feira do Moble de Galicia, na que o recinto feiral da Estrada incrementou notablemente a afluencia de visitantes rexistrada nos días anteriores.

A xefa do Servizo de Orientación Profesional e Relación con Empresas da Consellería de Cultura, Educación e Ordenación Universitaria, Ana Alzate, e a técnica do CIS Madeira, Montserrat Rodríguez, foron as encargadas de explicar os avances rexistrados neste proxecto xurdido en 2017 e que integra aos seguintes socios: os centros tecnolóxicos CIS Madeira e CIS Galicia; a Dirección Xeral de Educación, Formación Profesional e Innovación Educativa; as empresas Finsa e Ilva; o centro educativo Rakvere Ametikool, de Estonia; e a asociación británica de fabricantes de acabados “British Coating Federation” (BCF).

Montserrat Rodríguez precisou que “o obxectivo do proxecto é transmitirlle aos alumnos información actualizada sobre os acabados e revestimentos dos mobles porque eses alumnos serán logo os vehículos que levarán a innovación ás empresas cando se incorporen ao mercado laboral”. Para iso, as distintas partes implicadas no proxecto están a traballar en tres liñas: a creación dun manual para que o alumnado e o profesorado dispoña de información actualizada; un simulador virtual de vernizado, que se está a exhibir na Feira do Moble e que ten como misión facilitar a aprendizaxe dos alumnos á hora de realizar este labor; e unha base de datos de produtos empregados nos acabados e revestimentos, que será pública e que permitirá consultar a través de internet un listado de distintos fabricantes.

Produtos axeitados para a docencia

Pola súa parte, Ana Alzate explicou que “o papel da Consellería céntrase en coordinar a participación do profesorado que está a validar que os produtos que se elaboran neste proxecto sexan axeitados para a docencia e estean adaptados ás necesidades do alumnado”.

“A Consellería de Cultura, Educación e Ordenación Universitaria ten unha ampla experiencia na participación de proxectos europeos non só deste tipo de innovación, senón tamén en proxectos de mobilidade, tanto do alumnado como do profesorado e dos recén titulados. Por iso este proxecto encaixa na liña de apostar por unha Formación Profesional de calidade, baseada na internacionalización e na innovación, camiñando sempre a carón das empresas, para que cumpra as necesidades dos sectores produtivos. Isto tradúcese nunha Formación Profesional cun alto nivel de inserción laboral”, asegurou Ana Alzate, antes de destacar “o papel que ten a F.P. Dual, que coa incorporación este ano de 39 ciclos, está a camiñar ao lado das empresas”.

Pola súa parte, o estradense Xosé Magariños, mestre participante na parte pedagóxica do proxecto, lembrou que “esta iniciativa naceu dunha necesidade dos docentes de contar con material actualizado no ámbito do acabado e do revestimento do mobiliario, xa que non existía ningún material didáctico”. Ao respecto, avanzou que, tras presentar o estado do proxecto na Feira do Moble, a vindeira semana un grupo de mestres galegos viaxará ata Estonia para reunirse cos profesores estonios do Rakvere Ametikool ao fin de avaliar tanto os avances no manual como no simulador.

Ademais desta presentación, na xornada de hoxe tamén destacou a visita realizada á Feira do Moble polos moteiros participantes na primeira ruta A Estrada Trail, así como a actividade do circuíto infantil de seguridade vial, instalado a carón do pavillón 2 por xentileza de Reale Seguros A Estrada.

KEEP READING

Luís Villares insta á Xunta a mellorar os plans de formación e a apostar pola modernización das pemes do moble

21 Setembro, 2018 |by wecom | 0 Comments | blog | , ,

O voceiro de En Marea, Luís Villares, defendeu esta mañá durante a súa visita á 32ª Feira do Moble de Galicia a necesidade de apostar pola mellora na formación co obxectivo de adaptala ás necesidades e á realidade actual do sector do moble.

Villares realizou estas declaracións despois de manter un encontro con mestres e alumnos/as do IEs Antón Losada Diéguez e no transcurso do percorrido realizado polo recinto feiral na compaña do deputado no Parlamento Francisco Casal e da voceira de Móvete, Mar Blanco, así como do xerente da Fundación de Exposicións e Congresos da Estrada, Nemesio Rey.

O voceiro de En Marea destacou que “o futuro do sector do moble está inmerso nun proceso de modernización e, polo tanto, non se pode deixar a marxe da formación”: “é necesario que a Formación Profesional inclúa tamén á básica para captar alumnado para o ciclo medio que é o que se está a dar neste momento, e tamén con vocación de futuro, unha F.P. superior da madeira e do moble” afirmou.

“Desde En Marea o que se busca é que se forme unha man de obra cualificada para atender ás necesidades do sector, que pasan polo proceso de modernización e precisan polo tanto traballadores e traballadoras cualificadas”, asegurou. “É preciso, polo tanto, a actualización dos plan de formación e que a Xunta aposte pola  modernización dos equipos das pequenas e medianas empresas que son as que xeran a maior parte do emprego no noso país, tamén no sector do moble. Isto melloraría ao mesmo tempo a calidade de emprego de toda a comarca da Estrada”, concluíu o voceiro de En Marea.

Showcooking e premio xornalístico

Na xornada de hoxe tamén se celebrou o terceiro e último showcooking programado pola organización da Feira do Moble, que correu a cargo do cociñeiro Pepe Solla e tivo lugar no stand de Corral y Couto.

Finalmente, antes do peche do recinto feiral celebrouse o acto de entrega do XXIII Premio Xornalístico Manuel Reimóndez Portela, que recibiu Fernando Redondo Neira polo seu artigo “Derivas e encrucilladas do Novo Cinema Galego”, publicado na revista Tempos Novos.

Este acto, que estivo presidido polo concelleiro de Cultura da Estrada, Juan Constenla Carbón, que é membro do Comité de Seguimento do Premio, tamén contou coa presenza do secretario xeral de Política Lingüística, Valentín García, e do deputado provincial de Cutlura e Lingua, Xosé Leal, entre outras autoridades, ademais dos familiares de Reimóndez Portela. A entrega do premio estivo precedida da tradicional ofrenda floral no exterior do recinto feiral.

KEEP READING

Ana Pontón propón crear unha unidade pública de I+D+i para o sector da madeira e o moble

20 Setembro, 2018 |by wecom | 0 Comments | blog |

A segunda xornada da 32ª Feira do Moble de Galicia estivo marcada principalmente pola visita que realizou esta mañá a voceira nacional do BNG, Ana Pontón, acompañada por diversos cargos do seu partido, e pola charla técnica ofrecida polo subdirector xeral de Relacións cos GDRs de Agader, Javier Blanco Carballal, para explicar as axudas Leader.

Nas declaracións realizadas aos medios de comunicación antes de percorrer todo o recinto feiral, Ana Pontón manifestou o apoio do BNG “ao sector do moble da Estrada e a esta feira, que é importante e non só está referenciada na Estrada, senón que ten dimensión galega e pretende ser o escaparate da capacidade e da potencialidade que hai neste ámbito”.

Segundo Pontón, o sector do moble en Galicia “está a realizar un esforzo importante por situarse na onda da modernidade”, polo que aproveitou para reflexionar “sobre as potencialidades perdidas” que ten Galicia en relación co sector do moble e o sector da madeira: “hai moi pouca madeira de calidade producida en Galicia, xa que só o 8% da madeira que se tala no noso país acaba sendo madeira que se utiliza para a transformación e iso fainos perder oportunidades de emprego e valor engadido”.

Neste senso, solicitoulle á Xunta de Galicia “unha aposta polas madeiras de calidade a medio prazo” e propuxo, ademais, “a creación dunha unidade pública de i+D+i para o sector da madeira e do moble que aposte pola investigación en novos materiais, acabados, deseños vangardistas e por mellorar a produtividade do propio sector para posicionar a Galicia na vangarda da produción de mobles de calidade”.

En clave máis local, Ana Pontón amosou a súa “preocupación pola paralización da Cidade do Moble, un proxecto que leva durmindo durante anos nuns caixóns de San Caetano”. Na súa opinión, é preciso crear “solo empresarial a bo prezo, que permita dimensionar estas empresas”, sen esquecer a obriga “de ser coidadosos desde o punto de vista medioambiental”. Finalmente, tamén reclamou a mellora das vías de comunicación na Estrada, en especial a variante da Estrada, para mellorar a conectividade por estrada e a saída natural cara ao porto de Vilagarcía de Arousa.

Axudas do programa Leader

Pola súa parte, o subdirector xeral de Relacións cos GDRs de Agader, Javier Blanco Carballal, ofreceu esta mañá unha charla para explicar as posibilidades que ofrecen as axudas Leader ás empresas asentadas no rural. Ademais de apuntar os requisitos necesarios para acollerse a este programa, Javier Blanco asegurou que “o sector do moble e da segunda transformación da madeira ten no Leader unha moi boa oportunidade para desenvolver os seus proxectos de futuro”.

As actividades desta segunda xornada remataron coa celebración dun showcooking a cargo do cociñeiro Jaume García, de Velis Nolis Bistró (A Estrada), no stand de Fervenza Mobiliario (pavillón 3).

KEEP READING

Rueda destaca a importancia da internacionalización e a innovación na apertura da 32ª Feira do Moble de Galicia

19 Setembro, 2018 |by wecom | 0 Comments | blog | ,

O vicepresidente da Xunta de Galicia, Alfonso Rueda, destacou hoxe a importancia da internacionalización e da innovación na apertura da 32ª Feira do Moble de Galicia, que permanecerá aberta ata o vindeiro domingo no recinto feiral da Estrada. Rueda participou na inauguración acompañado polo secretario xeral de Política Lingüistica, Valentín García; o alcalde estradense, José López Campos; o xerente da Fundación de Exposicións e Congresos da Estrada, Nemesio Rey; os deputados provinciais Digna Rivas, Javier Dios e Belén Cachafeiro; e outras autoridades.

Durante os próximos cinco días A Estrada será a capital do moble con 65 expositores de distintos ámbitos que fan do evento un inmellorable escaparate de mobiliario. Segundo destacou o vicepresidente da Xunta, “o ano 2017 foi un ano récord en exportacións para o sector da madeira e as súas manufacturas, superando os 800 millóns de euros”. Ademais, remarcou que as empresas galegas do moble son algunhas das moitas que están a participar en proxectos de construción en máis de 90 países.

Alfonso Rueda manifestou tamén a aposta da Xunta de Galicia por proseguir na mesma liña de traballo, xa que “o crecemento económico de Galicia tense consolidado por riba do 3%, con cinco anos consecutivos superando o teito das exportacións”. Por tal motivo, incidiu en que “cómpre defender que o sector da madeira e do moble é unha industria fundamental para Galicia, cunha innegable vinculación co medio rural xogando un papel moi relevante na creación de emprego de calidade”.

KEEP READING

O vicepresidente da Xunta preside mañá na Estrada a inauguración da 32ª Feira do Moble de Galicia

18 Setembro, 2018 |by wecom | 0 Comments | blog

O vicepresidente da Xunta de Galicia, Alfonso Rueda, presidirá mañá ás 12.30 horas no recinto feiral da Estrada o acto de inauguración da 32ª Feira do Moble de Galicia, que reunirá ata o vindeiro domingo a 65 expositores procedentes de diferentes puntos de Galicia, Asturias, País Vasco, Madrid, Castilla-La Mancha, Comunitat Valenciana e Portugal. Tamén intervirán no acto inaugural o alcalde da Estrada, José López Campos, a deputada provincial Digna Rivas e o xerente da Fundación de Exposicións e Congresos, Nemesio Rey Pazos.

Nesta trixésimo segunda edición, o recinto feiral da Estrada, que conta cunha superficie global de 26.000 metros cadrados, conseguiu completar o 100% do espazo expositivo, polo que, segundo Nemesio Rey, “volve ser o maior escaparate de mobiliario, interiorismo e decoración de toda Galicia e os visitantes poderán atopar todo o necesario para amoblar o seu fogar ou o seu negocio”.

De feito, entre os stands da feira figuran firmas que desenvolven a súa actividade nunha ducia de áreas: moble contemporáneo, clásico, de vangarda, infantil, de cociña, de oficina, descanso, sanitarios, iluminación, interiorismo, contract e agasallos e complementos. Ademais, unha das novidades desta feira é a inclusión dun Espazo Contract no que estarán presentes varias empresas locais que operan neste mercado -algunhas das cales están a amoblar hoteis de luxo en diferentes países, establecementos de cadeas comerciais ou as embaixadas de Arabia Saudí en Camerún e Níxer, entre outros traballos-.

Entradas a 1 euro

Desde mañá ata o domingo 23, o recinto feiral permanecerá aberto ininterrompidamente desde as 11.00 ata as 20.00 horas e as entradas terán un prezo simbólico de 1 euro, sendo válida a mesma entrada para acceder á feira tódolos días.

 

KEEP READING

A fundación facilita a presenza da Federación Galega Euroconsumo na 32ª Feira do Moble

18 Setembro, 2018 |by wecom | 0 Comments | blog

O xerente da Fundación de Exposicións e Congresos da Estrada, Nemesio Rey, e a presidenta da Federación Galega Euroconsumo, Kim Llobet, déronlle visibilidade hoxe a un acordo de colaboración entre ambas entidades para facilitar a presenza deste colectivo na 32ª Feira do Moble de Galicia.

Segundo o acordo alcanzado, a fundación colaborará coa Federación Galega Euroconsumo permitíndolle a instalación dun punto informativo nunha das entradas do pavillón 5 para que este colectivo que dispón de oficinas de Atención ao Usuario e Consumidor na Estrada, Oleiros e Vilagarcía de Arousa poida divulgar a súa actividade.

Entre os servizos que presta a Federación Galega Euroconsumo figuran a atención ao consumidor e/ou usuario, a tramitación de reclamacións e denuncias, o asesoramento legal en materia de consumo e a representación nas Xuntas Arbitrais de Consumo.

KEEP READING