A 32ª Feira do Moble promocionarase a través dunha revista cunha tirada de 4.500 exemplares

14 Agosto, 2018 |by wecom | 0 Comments | blog | ,

A Fundación de Exposicións e Congresos da Estrada anuncia para comezos de setembro o lanzamento dunha publicación específica sobre a 32ª Feira do Moble de Galicia, da que se editarán 4.500 exemplares e que servirá para promocionar o certame en toda a comunidade.

Segundo explicou o xerente da fundación, Nemesio Rey, trátase dunha “revista de 32 páxinas, que forma parte do plan de comunicación e publicidade que se desenvolverá este ano, que será máis ambicioso que en edicións anteriores para tentar atraer un maior número de visitantes ao recinto feiral”. Así, avanzou que a campaña publicitaria abarcará tanto soportes impresos, como radiofónicos e tamén as redes sociais: “conseguimos incrementar o número de expositores, que xa supera os 60, e agora imos esforzarnos en captar máis público de toda Galicia para que o investimento que realizan para acudir á feira lles resulte rendible”.

Nemesio Rey agradece a implicación da Deputación de Pontevedra na edición desta revista -o organismo provincial asume a impresión de boa parte da tirada- e tamén dos demais anunciantes institucionais, entre os que figuran a Xunta de Galicia, a Asociación Comarcal de Empresarios (ACE), o GDR Terras de Pontevedra Norte e o propio Concello da Estrada. Precisamente, o xerente da fundación avanzou que a Concellería de Turismo estradense vén de sumarse á relación de expositores e participará na feira cun stand propio, do mesmo xeito que a Consellería de Cultura, Educación e Ordenación Universitaria contará tamén cun stand propio centrado na oferta de Formación Profesional.

O xerente da Fundación de Exposicións e Congresos destaca que a presenza de empresas da contorna será “substancialmente superior” á de edicións pasadas, xa que participarán arredor dunha quincena de firmas de diferentes sectores: Artesanía Ferradáns, Artest, Carpintería Rivas, Corral y Couto, Disaldro, Fervenza Mobiliario, Industrias J. Cerviño, Irmáns Picaño, Lani Estrada, Mucarce, Muebles Pose Mato – Nattex A Estrada, Osso Ebanistería Creativa, Reale Seguros A Estrada e Suyma+ Plus Madera.

KEEP READING

A Fundación de Exposicións e Congresos pon a punto os pavillóns para a 32ª Feira do Moble

2 Agosto, 2018 |by wecom | 0 Comments | blog

A Fundación de Exposicións e Congresos da Estrada está a aproveitar as condicións climatolóxicas favorables destes primeiros días de agosto para avanzar na posta a punto dos pavillóns do recinto feiral coa finalidade de que estean en perfecto estado para a celebración da 32ª Feira do Moble de Galicia, do 19 ao 23 de setembro.

No pavillón 4 xa remataron os traballos de acondicionamento e pintado do interior e no pavillón 3 a empresa Cubiertas Payno está a acometer estes días o proxecto de arranxo de parte da cuberta, que supón un investimento cercano aos 29.000 euros.

O xerente da Fundación de Exposicións e Congresos, Nemesio Rey, confirmou hoxe que “cando faltan aínda 47 días para o comezo da feira, xa se alcanzaron as 60 firmas participantes e xa só queda dispoñible o 5% do total da superficie ofertada”.

Nemesio Rey destacou que, ademais das empresas estradenses e das procedentes doutros puntos de Galicia, a trixésimo segunda edición da Feira do Moble de Galicia tamén contará con firmas procedentes de Alicante, Madrid, Leganés, Toledo, Asturias, País Vasco e Portugal.

 

KEEP READING

A Feira do Moble duplica a presenza local do sector e alcanza xa o medio cento de expositores

21 Xullo, 2018 |by wecom | 0 Comments | blog | , , , , ,

A Fundación de Exposicións e Congresos da Estrada informa que as reservas de superficie para participar como expositor na trixésimo segunda edición da Feira do Moble de Galicia, que se celebrará do 19 ao 23 de setembro, avanzan “a moi bo ritmo”, xa que nesta semana alcanzouse o medio cento de firmas confirmadas.

O xerente da fundación, Nemesio Rey, destaca que entre as 50 empresas figuran 13 firmas da Estrada e da contorna pertencentes aos sectores do mobiliario, o interiorismo e a decoración, o que supón que, “en comparación coa edición de 2017, nesta Feira do Moble duplicarase a presenza de empresas locais deses sectores”. Entre eses expositores da zona atópanse Suyma Plus Madera, Muebles Pose Mato, Lani Estrada, Corral y Couto, Mucarce, Fervenza Mobiliario, Artest, Carpintería Rivas, Osso, Artesanía Ferradáns, Gilcolor, Industrias J. Cerviño e Irmáns Picaño.

Segundo Nemesio Rey, “o sector está a percibir que estamos a incorporar cambios na organización e na promoción para tentar que a feira sexa máis rendible para os expositores e, ao mesmo tempo, máis atractiva para os visitantes”. Neste senso, adianta que ademais da elaboración dunha publicación promocional que sairá á rúa a comezos de setembro cunha tirada de máis de 4.000 exemplares, a fundación tamén comezou a traballar na preparación dunha campaña específica para as redes sociais. Empregando o hastag #EsteanoEuvou, a campaña publicitaria contará coa participación desinteresada de estradenses moi coñecidos e con gran visibilidade mediática nas súas respectivas áreas de actividade, como o humorista Isi, o triatleta Cristóbal Dios, o actor Xoque Carbajal, a polifacética humorista Saly Torres e o ciclista Álex Marque, entre outros.

“Estámoslle moi agradecidos a todos eles por brindarse a colaborar nesta campaña de forma totalmente altruista e pensamos que coa súa axuda imos reforzar a repercusión da feira para facerlle ver aos potenciais visitantes que este ano paga a pena pasar polo recinto feiral da Estrada do 19 ao 23 de setembro porque vai haber máis expositores, moita máis oferta e variedade de mobiliario e tamén incluso máis actividades adicionais”, explicou o xerente da fundación.

Cómpre lembrar que o prezo das entradas será dun euro e que cunha soa entrada poderá accederse ao recinto feiral durante os cinco días da feira. Ademais, os visitantes participarán en diferentes sorteos que está a ultimar a organización.

KEEP READING

Adxudicado a Cubiertas Payno o arranxo de parte da cuberta do pavillón 3

4 Xullo, 2018 |by wecom | 0 Comments | blog

O Comité Executivo da Fundación de Exposicións e Congresos da Estrada acordou nunha reunión celebrada esta mañá adxudicar á empresa Cubiertas Payno as obras de arranxo de parte da cuberta do pavillón 3 por un importe de 28.525,75 euros (IVE incluído).

Esta actuación, que disporá dun prazo de execución dun mes, pretende subsanar os danos que ocasionara un temporal no sector norte do pavillón 3, ao igual que xa se fixera na parte sur desa cuberta. Concretamente, os traballos consistirán na substitución da chapa existente por un panel sandwich axeitado, ademais da instalación de canalóns e baixantes.

O pavillón 3 é precisamente o que acollerá o acceso principal á Feira do Moble de Galicia e no que se ubicarán a práctica totalidade dos expositores locais, entre os que xa figuran Corral y Couto, Mucarce, Carpintería Rivas, Fervenza Mobiliario, Suyma Plus Madera, Artest Mobiliario, Lani Estrada e Gilcolor.

Na reunión do Comité Executivo estiveron presentes o alcalde da Estrada, José López; a deputada provincial Consuelo Besada; a representante da Cámara de Comercio de Vigo, Pontevedra e Vilagarcía, Lucía Pedroso; o presidente da Asociación Comarcal de Empresarios, Fernando Martínez; o xerente da fundación; Nemesio Rey; a tesoureira, Mercedes Cuiña; e o secretario, Jorge Andión.

KEEP READING

Nemesio Rey augura que a XXXII Feira do Moble preséntase como “a mellor dos últimos anos”

3 Xullo, 2018 |by wecom | 0 Comments | blog | ,

O xerente da Fundación de Exposicións e Congresos da Estrada, Nemesio Rey Pazos, aproveitou hoxe a presentación da renovada páxina web desta entidade, feiradomoble.gal, para informar dos avances na organización da trixésimo segunda Feira do Moble de Galicia, que terá lugar do 19 ao 23 de setembro e que, na súa opinión, “preséntase, a priori, como a mellor dos últimos anos”.

Nemesio Rey, que compareceu en rolda de prensa acompañado polo concelleiro de Industria da Estrada, Óscar Durán, confirmou que a día de hoxe xa confirmaron a súa presenza na feira unha trintena de expositores, entre os que destacou a participación de firmas locais como Mucarce, Corral y Couto, Fervenza Mobiliario, Carpintería Rivas, Artest, Lani Estrada, SuymaPlus Madera ou Artesanía Ferradáns.

“Para a fundación é moi importante contar coa implicación do sector local do moble e da madeira, porque sen eles posiblemente esta feira non tería sentido na Estrada; e por iso queremos animar a algunhas firmas que aínda están dubitativas a que dean un paso ao frente porque, entre todos, conseguiremos que a feira sexa moito mellor”, asegurou o xerente da fundación.

Cando faltan 77 días para a inauguración do certame, Nemesio Rey remarcou entre as novidades desta trixésimo segunda edición a inclusión dunha Zona Contract “orientada a empresas cuxa canle de distribución non é tanto o público familiar, senón os negocios, as empresas e as institucións ou prescriptores que traballan para elas, como arquitectos, deseñadores e interioristas”. Ademais, referiuse á redistribución dos expositores en novas ubicacións, “congregando á práctica totalidade dos expositores da Estrada no pavillón 3”, e apuntou tamén a substitución das xornadas técnicas, “que apenas estaban a xerar interese nos últimos anos”, por actividades indirectamente vinculadas ao mobiliario de cociña, como showcookings, etc.

Por último, salientou a “forte aposta” que realizará a fundación nos ámbitos da comunicación e a publicidade, xa que considéraas “vitais para conseguir que a feira sexa rendible para os expositores e atractiva para os visitantes”. Neste senso, indicou que ademais de planificar unha campaña específica para as redes sociais na que se implicarán persoeiros coñecidos da Estrada, tamén está prevista a distribución de alomenos 2.000 exemplares dunha publicación promocional da feira que se editará grazas á colaboración da Deputación Provincial de Pontevedra.

KEEP READING

A XXXII Feira do Moble incorporará “cambios substanciais para marcar un punto de inflexión”

6 Xuño, 2018 |by wecom | 0 Comments | blog

O xerente da Fundación de Exposicións e Congresos da Estrada, Nemesio Rey, avanzou hoxe que a XXXII Feira do Moble de Galicia incorporará “cambios substanciais” en diferentes aspectos organizativos e de marketing cos que se pretende “marcar un punto de inflexión para que a feira sexa máis rendible para as empresas expositoras”.

Nemesio Rey explicou que, tras os contactos mantidos recentemente cos diferentes grupos políticos e coas empresas locais do sector, o persoal da fundación está a traballar “nunha batería de medidas” que se irán facendo visibles nas vindeiras semanas e que buscan “darlle aires de cambio e un novo pulo á feira”. Remarcou que “o obxectivo de partida da fundación non é encher o espazo expositivo de calquera forma, senón que vaise priorizar a participación de moblarías restándolle protagonismo e superficie aos sectores complementarios”.

Para conseguilo, centrarase o labor de comercialización da superficie de exposición en firmas dunha ducia de subsectores: moble de vangarda, moble contemporáneo, moble clásico, mobles de cociña, moble infantil, mobles de oficina, mobiliario exterior, sanitarios, interiorismo e decoración, descanso, iluminación e agasallos e complementos. Ademais, ofreceráselle ás empresas da bisbarra da área de contract a posibilidade de participar nun espazo común que permita poñer en valor ante os milleiros de visitantes da feira que “as fábricas de mobles da Estrada que sobreviviron á crise seguen a traballar para o mercado nacional e internacional”.

Redistribución de stands
Outros dos cambios organizativos que xa están previstos son limitar a duración da feira a cinco días -do 19 ao 23 de setembro, en horario continuado de 11.00 a 20.00- e levar a cabo unha redistribución dos stands, de forma que os visitantes poidan percibir mellor “unha imaxe de cambio”. Ao respecto, Nemesio Rey destacou que, ademais de retirarse os stands fixos que levaban moitos anos instalados, acordouse ubicar ás firmas locais no pavillón 3, que será a entrada principal ao recinto feiral.

En relación coa comercialización do espazo expositivo, Nemesio Rey salientou que nos últimos días comezou a realizarse este labor con empresas locais e destacou que “as ideas que lles trasladamos para transformar un pouco a feira están a ter moi boa acollida”. De feito, tres firmas como Mucarce, Fervenza Mobiliario e Artest xa se converteron nas primeiras empresas da contorna en contratar espazo.

Comunicación, marketing e publicidade
Por outra banda, a fundación tamén reforzará o traballo nas áreas de comunicación, marketing e publicidade para que a trixésimo segunda edición da Feira do Moble “soe con forza en toda Galicia e atraia non só ao gran público, senón tamén a profesionais dos sectores da arquitectura e a decoración”. Neste senso, Nemesio Rey anticipou que ademais de estrear proximamente unha nova páxina web, está prevista a edición dunha revista centrada nas firmas expositoras e apostarase tamén pola divulgación do certame nas redes sociais.

“O repunte da economía, da actividade empresarial e dos mercados inmobiliario e residencial está a supoñer un relanzamento da venda de mobles e queremos que a Feira do Moble da Estrada volva ser o gran escaparate para os potenciais compradores que haxa en Galicia”, concluíu o xerente da fundación.

KEEP READING